සොක්රටීස්ට අහිමි ප්රජාතන්ත්රවාදය.
සොක්රටීස් - අපි මේ නෞකාවේ කපිතාන්වරයා ලෙස තෝරාගන්නේ කවුද ?
ඇඩිමැන්ටස් - අපි ප්රජාතන්ත්රවාදීලෙස එකී තීරණයට එළඹෙමු.
සොක්රටීස්- ජනතා මත විමසීමකට යමු කියලද ඔබ කියන්නේ?
ඇඩිමැන්ටස්- එහෙම නේද වඩා සාධාරණ?
සොක්රටීස් - කවුද ඒ ජනතා පාර්ශවය?
ඇඩිමැන්ටස් -අපි නෞකාවේ ගමන්ගන්නා මගීන්ගෙන්ම විමසමු.
සොක්රටීස් - ඒ අයට නාවුක යාත්රා හා මුහුදු ගමන් පිළිබද දැනුමක් තිබේද ?
ඇඩිමැන්ටස් - දැනුම වැදගත් සාධකයක් ද ?
සොක්රටීස් - නෞකාවක් යාත්රාකරවීමට මුහුදු ගමන් පිළිබද දැනුම අත්යාවශ්යයි.
ඇඩිමැන්ටස් - එහෙත් මගීන්ගේ විස්වාසය දිනාගත් පුද්ගලයෙකුට නොවේද ඔවුන්ගේ වගකීම පැවරියයුත්තේ?
සොක්රටීස් - එහෙත් පවතින්නේ කුණාටුසහිත කාලගුණයක්.
ඇඩිමැන්ටස් - එනිසාම නොවේද, බහුතරයකගේ විස්වාසය දිනාගත් පුද්ගලයෙකු අවශ්යවෙන්නේ...?
සොක්රටීස් - ඒත් ඔහු මුහුදුගමන් පිළිබද පුරුදුකාරයෙක් නොවේනම්, ඇතැම්විට වැරදි තීරණයක් ගතහැකියි?
ඇඩිමැන්ටස් - ඒත් මගීන්ගෙන් බහුතරයක් ඔහු පිළිබද විස්වාස තබනවානම් ගැටළුවක් නෑනේ.
සොක්රටීස් - එහෙත් මෙය අවධානම්සහගත අවස්ථාවක්. කපිතාන්ගේ අත තමයි සියල්ලගේ ජිවිත රැඳී තිබෙන්නේ.
ඇඩිමැන්ටස් - එය තමයි අභියෝගය බාරගැනීම. මගීන් විසින්ම තීරණය කරනවානම් අපි වගකීමෙන් නිදහස්.
සොක්රටීස්- ඔබ කියන්නේ බහුතර තීරණයට ඉඩදී, ඔවුන් තීරණය කරන්නාවු කවුරුන් හෝ සමග කුණාටුමුහුදේ නෞකාව යාත්රා කළයුතු බවද?
ඇඩිමැන්ටස් - එය නොවේද ප්රජාතන්ත්රවාදී තීන්දුව?
සොක්රටීස් - ඒ තීරණය ආරක්ෂාකාරී එකක් වේවිද?
ඇඩිමැන්ටස්- බහුතරය විසින් ඒ වගකීම බාරගනීවි.
සොක්රටීස් - ඔබ හිතන්නේ එය බුද්ධිමත් තීරණයක් බවද?
ඇඩිමැන්ටස් - අමතක කරන්න එපා, ඔබ මේ ප්රශ්නකරන්නේ ප්රජාතන්ත්රවාදය බව.
සොක්රටීස්- මම ප්රශ්නකරන්නේ මේකී තීරණාත්මක අවස්ථාව තුළ ගන්නා ජිවිත අවධානමයි.
ඇඩිමැන්ටස්- ඔබ නැවත, නැවතත් අහන්නේ එකම ප්රශ්නයක්. එහෙත් ඔය කුමන ප්රශ්නයටත් ඇත්තේ එකම පිළිතුරක් පමණයි.
සොක්රටීස්- එකම ප්රශ්නය නැවත නැවතත් අහන්නේ මා වෙනුවෙන් නොවේ. මේ නෞකාවේ ගමන්ගන්නා දහසක් මගීන්ගේ ජීවිත වෙනුවෙන්.
ඇඩිමැන්ටස් - ඇයි ඔබ ඒ පිළිබඳ ඔයතරම් කරදරවන්නේ?
සොක්රටීස්- මේ නෞකාවේ ඉන්නේ ඇතීනියානුවන්. ඔවුන් මට පිටස්තරයින් නොවේ. මේ සියළුදෙනා මගේ නෑයන්, මිත්රයන් මෙන්ම මිත්රයන්ගේ නෑයන් හෝ නෑයන්ගේ මිත්රයන්. කොහොම බැලුවත් අපේ කට්ටිය.
ඇඩිමැන්ටස්- ඒත්, ඔවුන් විසින් ඔවුන්ට වඩාත් සුදුසුයැයි විස්වාස කරමින් ගන්නාවූ තීරණය පිළිබඳ ඔබ තැවෙන්නේ මන්ද?
සොක්රටීස් - බහුතර මතය සැමවිටම, නිවැරදි මතය නොවන නිසා.
ඇඩිමැන්ටස් - හොඳයි, ඔබ කියනා අන්දමින් එය වැරදි තීරණයක් වුවත්, එය ඔවුන්ගේ ජීවිත වෙනුවෙන් ඔවුන් විසින්ම සාමුහිකව ගන්නාලද තීරණයක්.
සොක්රටීස් - ඔවුන් වැරදි තීන්දුවක් ගතහොත්, ඊට ඔවුන් ජීවිතවලින් වන්දිගෙවිය යුතුද?
ඇඩිමැන්ටස්- ඔවුන් එකී තීරණය ගෙන ඇත්තේ සිය කැමැත්තෙන්නම්, ඔවුන්ගේ ඉරණමට ඔවුන් විසින් වගකිවයුතු නොවන්නේද?
සොක්රටීස් - එහෙත්, මේ ගන්නා තීරණය වැරදි එකක් බව මුහුදු ගමන් පිලිබඳ වැටහීමක් ඇති සුළුතරයකට වැටහේනම්, ජිවිත අනතුරක් පෙනි පෙනීම මොවුන්ට මේ නෞකාව දියත්කරන්න ඉඩදෙන්නට කියාද ඔබ පවසන්නේ?
ඇඩිමැන්ටස්- නෞකාවේ මගීන් හා නාවිකයින් විසින් ගන්නාවු සාමුහික තීන්දුවකට ඔබ විරුද්ධත්වය ප්රකාශකරනවා කියන්නේ ඔබ ප්රජාතන්ත්රවාදයට එරෙහිවීමක්.
සොක්රටීස්- වරද, මේ නෞකාවත් සමගම එහි ගමන්ගන්නා සියළු මගීන් මුහුදුබත් වීමට ඉඩ හැරීමද , නැත්නම් සිදුවියහැකි වරදක් වැලැක්වීමට උත්සාහකිරීමද ?
ඇඩිමැන්ටස්- බහුතරයකගේ මතය අභිබවා තීරණය ගැනීමට සුළුතරයකට ඇති බලය කුමක්ද?
සොක්රටීස් - සුළුතරයකට මේ පිළිබඳ ඇති විශයානුබද්ධ දැනුම.
ඇඩිමැන්ටස් - බහුතර මතයට ඉඩදීම වඩා සාධාරණ බවත්, එය වනාහී ප්රජාතන්ත්රවාදය බවත් ඇතීනියානුවන්ට කියා දුන්නෙත් ඔබම නේද?
සොක්රටීස් - එය මා විසින් හඳුන්වාදෙනලද්දක් වුවත්, පසුව එහි ඇති ප්රායෝගික ගැටළු පෙනීයනවිට, ඊට විරුද්ධ වීමට ඇති මගේ අයිතිය අහෝසිවේද?
ඇඩිමැන්ටස් - ඔබ විසින් තනිපුද්ගලයෙකු ලෙස යෝජනාකළ මථයක් , බහුතරයක් පිරිස් විසින් බාරගත් පසු , එය ඔබේ මතයලෙස ඔබට පමණක් හිමි නොවන බවත්, එය බහුතරයකගේ අයිතිය බවට අනුවර්ථනය වනබවත් ඔබ නොදන්නේද? .
සොක්රටීස්- මුල් මතය තවදුරටත් එලෙසින්ම මට පිළිගත නොහැකිනම්?
ඇඩිමැන්ටස් - ඔබ පමාවුවා වැඩියි. ඔබ පිළිනොගත්තත් දැන් එය බහුතරයක් විසින් බාරගෙන අවසන්.
සොක්රටීස් - එහෙත් මින් වියහැකි හානිය මා වැලැක්විය යුතුයි...
ඇඩිමැන්ටස් - එවිට ඔබ කරන්නේ වරදක්. වරදකට හිමිවියයුත්තේ දඬුවමක්.
සොක්රටීස්- එත් දඬුවම නිසාවෙන් මා වරදක් අනුමත කරන්නේ කෙසේද?
ඇඩිමැන්ටස් - ඔබ කැමති වුනත්, නැතත්, දැන් ප්රජාතන්ත්රවාදය කියන්නේ බොහෝ මිනිසුන් අදහන දහමක්. එය විවේචනය කිරීම රාජ්ය ද්රෝහීත්වයක්.
සොක්රටීස් - එහෙමද? එහෙනම්, නුඹලාගේ ප්රජාතන්ත්රවාදයට ජයවේවා!
(ප්ලේටෝගේ " ඩෙමොක්රසි " ග්රන්ථයේ 6 වන වෙළුම අනුසාරයෙන් නිර්මිත කතා පිංචකි )
පසුවදන - 399 BC හීදී ඇතැන්ස් නුවරට ඒකරාශීවු ඇතීනියානුවන් 500 කගේ මථවිමසීමකින් අනතුරුව, 52%ක් වු මායිම් බහුතරයක් විසින් ගන්නාලද තීන්දුවකට අනුව, තමා නොකළ වරදක් වෙනුවෙන් චෝදනා ලැබු සොක්රටීස්ව ඝාතනය කිරීමට නියම කිරීමෙන් පසු, "හැම්ලොක්" නැමති විස ශාකයුශ පානය කිරීමෙන් සොක්රටීස් මරනයට පත්විය.
- ඉනෝකා සත්යාංගනී කීර්තිනන්ද
Our democracy no longer represents the people. Here's how we fix it | Larry Lessig |
Comments
Post a Comment